Shumë të rinj ambicioz dhe që kanë dëshirë të punojnë dhe të realizojnë qëllimet e tyre për të ardhmen, gjithmonë janë të prirur që të lëvizin nga vendi i tyre dhe ti drejtohen një vendi të huaj ku mund të përmbushin ëndrrat e tyre.
Së fundmi, sipas bankës ndërkombëtare HSBC vendi ideal për këta njerëz është padyshim Gjermania e cila për vitin 2019 zë vendin e parë si vendi më i mirë ku mund të punosh.
Sipas rezultatit të një sondazhi të kryer te 22,318 persona që jetojnë jashtë vendit të lindjes, në 163 vende të botës, Gjermania është vendi i duhur për të përmbushur ambiciet e tua.
Faktorët e jashtëm, si klima ekonomike dhe politike, nuk u morën në konsideratë drejtpërdrejt, por mund të kenë ndikuar në vlerësimet e të intervistuarve.
Për herë të parë, Gjermani ka kapërcyer Suedinë dhe Zvicrën. Nuk bëhet fjalë vetëm për kushtet e punës në vetvete. 65% e të intervistuarve e vlerëson vendin e punës më produktiv, kurse 70% e atyre që jetojnë dhe punojnë jashtë vendit të origjinës thotë që ekuilibri jetë personale – jetë profesionale është përmirësuar duke u transferuar në Gjermani.
Zvicra
Zvicra renditet në vendin e pestë në klasifikimin e këtij viti. Vendi ka marrë një vlerësim të mirë veçanërisht për progresin në karrierë. Thuajse dy të tretat e të intervistuarve, apo 62%, thanë që Zvicra ofron një mjedis të mirë për zhvillimin e tyre profesional. Megjithatë 63% e të intervistuarve pretendonin një ekuilibër më të mirë mes jetës profesionale dhe jetës personale krahasuar me vendin e tyre të origjinës.
4.Emiratet e Bashkuara Arabe
Emiratet e Bashkuara Arabe, me Dubain dhe Abu Dhabin, qendra ekonomike, renditen në vendin e katërt, duke ruajtur pozicionin për të katërtin vit me radhë si vendi më i mirë për ata që duan të jetojnë dhe punojnë jashtë vendit të origjinës. Emiratet e Bashkuara Arabe vlerësohen veçanërisht për lehtësitë ekonomike. 95% e të intervistuarve thanë se kanë pasur përfitime si pjesë e kontratës së punës – niveli më i lartë në botë, ndërkohë, thuajse tre të katërtat (73%) thanë që perspektiva e tyre e fitimeve ishte më e mirë se sa në vendin e lindjes. Thuajse gjysma e të intervistuarve thanë se kultura e punës ishte më e mirë se sa në vendin e origjinës.
3.Britania e Madhe
Pavarësisht Brexit, Britania e Madhe është ngjitur me 6 pozicione, duke u renditur e treta në klasifikimin e vendeve më të dëshiruara për të jetuar dhe për të punuar. Me perspektiva të mira për zhvillimin profesional dhe personal, Britania e Madhe ka fituar pikë këtë vit për një ekuilibër të mirë mes jetës profesionale dhe personale dhe pagave të larta. Pjesa më e madhe e të huajve që jetojnë dhe punojnë në Britaninë e Madhe (58%) thanë që kultura e punës është më e mirë se në vendin e origjinës. Sipas të intervistuarve, Britania e Madhe është vendi më i mirë për të mësuar aftësi të reja dhe vendi i katërt më i mirë për të ngjitur shkallët në karrierë, duke lënë pas Hong Kongun, Shtetet e Bashkuara të Amerikës dhe Singaporin.
2.Bahrejni
Këtë vit, Bahrejn renditet në vend të dytë (+10 pozicione nga viti i kaluar) si vendi i dytë më i mirë për të huajt për të jetuar e për të punuar, falë lehtësive të shumta në kontratat e punës. 77% e të intervistuarve thanë se perspektivat e tyre të fitimeve ishin përmirësuar në Bahrejn krahasuar me vendin e origjinës (62% vitin e kaluar). Përveç lehtësive të shumta në kontratën e punës, Bahrejn fiton pikë edhe në zhvillimin e karrierës.
1.Gjermania
Në krye të klasifikimit këtë vit është Gjermania. Besnike ndaj reputacionit për efikasitetin, Gjermania është konsideruar edhe si një vend për progres në karrierë, me 65% e të intervistuarve që e cilëson si vend “produktiv”. 70% e të intervistuarve thonë që ekuilibri mes jetës profesionale dhe asaj personale është përmirësuar që kur është transferuar në Gjermani. Të huajt që jetojnë dhe punojnë në Gjermani e vlerësojnë vendin për kulturën e punës dhe nivelin e sigurisë në punë. Thuajse tre të katërtat e të intervistuarve raportuan për përmirësim të sigurisë në punë në Gjermani krahasuar me vendin e origjinës.
Burimi: Monitor
