Aktori Agron Llakaj ishte mes personazhe të njohur që hyri disa ditë më parë në shtëpinë e “Big Brother VIP”. Aktori i humorit u bë pjesë e shtëpisë më të famshme për të mbështetur kolegun dhe mikun e tij Donad Veshaj.
Në një intervistë për “Shqipëria live”, ai tregoi eksperiencën e veçantë dhe përjetimet që pati nga ajo darkë. Sipas Agron Llakajt, Donaldi ka qenë i vërtetë në të gjithë këtë përvojë. Megjithatë, ai ka dhe kritika për Donaldin dhe u ndal te debati që artisti ka pasur moderatoren Einxhel Shkira, për një bashkëpunim që kanë pasur në të kaluarën.
“Nuk e kam ndjekur shumë thellë, por kam parë videot e shkurta, ka pasur dhe momente që i kemi sjellë në ‘Al Pazar’. Unë futem te burrat që nuk kanë turp nga loti, por loti nuk del kot. Ai është i ndjeshëm, nuk kthehet asnjëherë pas kur nis një aksion. Distancohem nga pjesë e marrëdhënieve që ka krijuar, nuk jam askush për ta gjykuar. Kudo më flasin për Donaldin. Më ka ardhur mirë për atë që ka treguar Donaldi aty, që është bërë kaq popullor, është dhunti e tij, jo vetëm puna ime. Ka treguar veten ashtu siç është”, u shpreh aktori.
"Nëse do të mundesha, do t’i bërtisja Donaldin për sjelljen që bëri", tha Agron Llakaj. “I vetmi moment që i kam tërhequr vëmendjen ka qenë debati banal me Einxhelin. Doja ta mbyllja televizorin kur e pashë atë pjesë. Po të mundesha, do t’i kisha dhënë një të ulëritur të fortë. Nuk duhet të flitej me një vajzë ashtu, edhe pse u provokua”.
Aktori shton se “unë jam me parimin, që gjërat nga jashtë, nuk duhet të futen brenda”, pasi sipas tij ky debat nuk kishte pse të diskutohej brenda shtëpisë.
