Sot bëhen 14 ditëlindje pa Dritan Hoxhën dhe në këtë ditë Lori Hoxha ndau një letër tejet prekëse. Lori i tregon të atit përmes kësaj letre sesi jeta e tyre ka ndryshuar, por shumë gjëra kanë mbetur njësoj.
Lori flet për të ëmën, vëllain e motrat duke shprehur edhe dëshirën që Tani të kishte njohur dy djemtë e Sarës sepse i ngjajnë shumë.
Letra e Lorit: "Teksa shkruaj kam përballë pamjen më të bukur në botë: një nga ato që kërkoje me ngulm ti gjithë vitin sepse po të ndjeje pak ftohtë futeshe direkt në makinën tënde dhe fërkoje duart. Kam përballë Itanin, që është rimishërimi jot; po aq i gjatë, i bukur, kokëfortë dhe me atë humorin e bezdisshëm që të vinte në siklet përpara tavolinës po ti prapë qeshje se ishte me vend. Nga ana tjetër është Sara, që po ndjek Roman dhe London; njëri do të luajë ping pong dhe tjetri më thotë që qenkam bërë pak kaçurrelse sot. Dy njerëz komplet të ndryshëm, që i imagjinoj në shpinën tënde teksa i tregon botën tënde dhe i thua “jo atë”, se e ndaje shumë mirë të drejtën dhe refuzoje të bëheshe palë me çdo gjë që nuk ishte e tillë. Të ngjajnë shumë mendoj unë, ose jam unë që kërkoj me ngulm të të shoh në çdo brez që do të vijë. Mami po pi kafen që e shoqëron me një cigare. Ta dish që e ka filluar që kur nuk vije më në shtëpi. E di, e di, i kam thënë po e do ta dëgjojë nga ty. Diku do dilte nga dëshirat e tua megjithëse ato më të mëdhat i ka ruajtur të gjitha. Redia më shkruan në telefon; është po aq kokëçarëse sa kur vije në Itali dhe thoje “goca mamit kjo” se nuk dilte te dera si unë dhe Sara. Redia vazhdon do me atë dashurinë që mban nga brenda dhe boshllëkun tënd e ndjen sot më shumë se kurrë. Gjithsesi ta dish, atë do gjeje zgjuar në oraret që rrije ti dhe me siguri do vinte e para kur doje ndonjë xhiro me makinë natën vonë. Unë jam këtu; me dyshimet e mia si gjithmonë për çdo gjë. Kurioze a do ishe i lumtur për ne dhe kush do ishim ne sot me ty. Gjithë jetën pas ikjes tënde kam dëgjuar fjalinë “po të mos ishe vajza tij…”dhe jam kuroze vërtetë dhe pse e di që mua vajzën tënde më bën ajo çka kam brenda. Më bëjnë flokët kaçurrela, karakteri impulsive, dashuria për jetën e bukur, pretendimet e larta për njerëzit, parimet e forta dhe dëshira për tu vetëpërmirësuar çdo ditë. Por më kurioze jam si do kishim ecur bashkë sot. Nuk u zgjata aq sa doje, por besoj do kishim ecur me kokën lartë të dy. Viti i 14 që festojmë ditëlindjen tënde pa ty dhe merakun tënd që po “plakesh”. Do hap një verë të kuqe sot dhe pse ta dish që unë e pi të bardhë. Diku do ndryshoja dhe unë nga ti dhe pse të ndjek çdo hap e të kopjoj sikur je influenceri im i preferuar. Më mungon çdo ditë e të kujtoj çdo ditë po ti këtë e di se s’je shumë larg. Gëzuar ditëlindjen. E jotja sot dhe gjithmonë. Lori Tanit"
