Pjesëmarrja e këngëtarit serb Goran Bregoviç në koncertin që do të mbahet në Korçë ka sjellë reagime të shumta në Shqipëri dhe Kosovë.
Nënkryetarja e Bashkisë së Korçës, Bunila Themeli ka folur për artistët të cilët u tërhoqën nga pjesëmarrja. “Artistë nga Kosova janë tërhequr nga pjesëmarrja e tyre. Kishim Dafina Zeqirin, Capital T, grupin “NA”, por që u tërhoqën. Edhe Dren Abazi, por ai për arsyet e tij personale”, tha nënkryetarja e Bashkisë Korçë për “Reporteri.net“.
Më tej, ajo zbuloi se vetëm këngëtari Shemsi Krasniqi nga grupi “Ilirët” është ai i cili do të performojë para publikut në Korçë.
“Kemi Shemin nga “Ilirët”, pasi ai është i vetmi nga Kosova i cili do të performojë në Festën e Birrës, do të thotë vetëm këta emra kishim nga Kosova, por që vetëm Shemi ka pranuar. Ndërsa do ketë një bandë nga brazili, një greke si dhe emra të tjerë shqiptarë”, përfundoi, Bunila Themeli.
