Kryetarja e LSI-së Monika Kryemadhi ka zgjedhur të marrë mandatin si deputete në qarkun e Fierit, duke hequr dorë nga Tirana. Mandati i qarkut të Tiranës i kalon nënkryetarit Petrit Vasili, i cili ishte i treti në listën e LSI-së për kryeqytetin.
Me marrjen e mandatit të Fierit nga Kryemadhi, i hiqet shansi për të hyrë në Parlament Keidi Mehmetajt.
Letra e Kryemadhit drejtuar KQZ:
I nderuar zoti Celibashi,
Në përgjigje të kërkesës tuaj me nr. 8542, prot, datë 17.06.2021 dhe nr. 486 prot, datë 17.06.2021, ju bëj me dijeni se:
Në zbatim të Kodit Zgjedhor të Republikës së Shqipërisë, neni 67, pika 3, shpreh vullnetin tim duke zgjedhur mandatin e deputetit të Lëvizjes Socialiste për Integrim në Qarkun e Fierit.
Duke ju falënderuar për bashkëpunimin Tuaj.
Kujtojmë që Kryemadhi garoi në tre qarqe, Tiranë, Fier, dhe Elbasan, ku rezultoi fituese në dy të parët.
Katër deputetët e rinj të LSI-së do të jenë, Monika Kryemadhi, Erisa Xhixho, Petrit Vasili dhe Agron Çela.
Burimi: Panorama
