Gazetari austriak Florian Klenk ka deklaruar përmes një postimi në Twitter se një nga sulmuesit terrorist në Vjenë është me origjinë shqiptare. Klenk shkruan se ai ka zbuluar se emri i tij është Kurtin S. dhe se ishte 20-vjeç.
Gazetari tregon se i riu është lindur dhe rritur në Vjenë, por ka rrënjë shqiptare dhe prindërit e tij janë nga Maqedonia e Veriut.
Klenk tregon se i riu ka qenë nën vëzhgimin e Shërbimit Sekret pasi ishte mes 90 islamikëve që kishin synim të shkonin në Siri, por u ndalua në korrik.
Postimi i gazetarit: “Kam zbuluar disa detaje rreth terroristit. Emri i tij është Kurtin S., i lindur në 2000, ishte 20 vjeç, u lind dhe u rrit në Vjenë dhe ka rrënjë shqiptare. Prindërit e tij vijnë nga Maqedonia e Veriut dhe nuk bien në sy kur bëhet fjalë për Islamizmin.
Ai ishte në objektivin e Zyrës për Mbrojtjen e Kushtetutës sepse ishte një nga rreth 90 islamikë austriakë që donin të udhëtonin në Siri. U ndalua në korrik. Policia nuk e besoi që po planifikonte një sulm terrorist në Vjenë".
