Ministrja e Shëndetësisë, Ogerta Manastirliu ka publikuar në rrjete sociale mesazhin e një mjekje, të quajtur Migena Qato. Ajo iu bën thirrje qytetarëve të tregohen të kujdesshëm pasi Koronavirusi nuk kursen askënd, madje tani dominuese janë rastet e të rinjve të infektuar.
“Për më tepër se 5 muaj, po përballemi me një pandemi të përmasave, që kurrë më parë nuk ishim përballur. Ditët e fundit kanë qenë jo të lehta për ne, pasi numri i rasteve është shtuar në mënyrë të konsiderueshme dhe jo vetëm kaq. Tani dominojnë për fat të keq edhe mosha të reja, të cilat kanë qenë të paprekura nga sëmundje të tjera më parë. Ndaj apeli shkon që të jemi shumë të kujdesshëm, të ruajmë distancën sociale, sepse tani Covid nuk ka më preference në moshë, nuk po kursen asnjë subjekt të popullatës. Ndaj jeni të kujdesshëm, mbroni veten tuaj dhe të afërmit”, thotë Qato në video.
