Pyetja e gazetares së Top Channel, Kristi Gongo në konferencën e mbajtur për mediat, nuk është pritur mirë nga ministrja Besa Shahini. Gazetarja e pyeti ministren në lidhje me abuzimin seksual të të miturës nga roja i shkollës, se pse nuk është vepruar në kohë kur në fakt kishin informacion nga drejtori i shkollës për rastin në fjalë. Ministrja Shahini tha se nuk ka pasur informacion, duke mos e lejuar gazetaren të vazhdojë. Më pas gazetares i është hequr mikrofoni.
Debati në Konferencë:
Gazetarja: Një pyetje për ministrinë, ju thoni se ndiheni krenare kur bëhet denoncimi për këtë çështje, por nga ana tjetër, ju kishit informacion për këtë çështje. Pse nuk vepruat?
Besa Shahini: Kjo nuk është pyetje, kjo nuk është profesionale.
Gazetarja: Kjo nuk është ajo që them unë.
Besa Shahini: Është nga ana juaj si gazetare, dashakeqëse.
Kristi Gongo: S’është nga ana ime, është nga ana e drejtorit të shkollës.
Besa Shahini: Është joprofesionale të bëni pyetje tendencioze.
Kristi Gongo: Nuk mund të më akuzoni për joprofesionalizëm.
Besa Shahini:Mos flisni për rastet se dëmtoni viktimat. Por çdo indikacioni që është denoncuar nga drejtori janë marrë masat e pezullimit dhe shkarkimit. Po ju vë në kontekst, si gazetar që mbuloni arsimin. Rojet e shkollës janë punësim i bashkisë. Në këtë rast, bashkia e ka tërheq rojen me kërkesën e drejtorit të shkollës. Nuk ka patur kurrfarë njoftimi. Arsyeja pse mendoj se është pyetje joprofesionale është kjo, se një drejtor që jep deklarata pasi është shkarkuar, duhet të shtrohen pyetjet para se të bëni pyetje tendencioze. (Fiket mikrofoni i gazetares së Top Channel).
