Në rubrikën "Trotuar" në "E diell" këtë të diel u diskutua mbi temën "Të rinjtë në politikë" dhe e ftuar ishte edhe deputetja Rudina Hajdari. Gjatë rubrikës, Hajdari pati një diskutim me Dejvin, i cili njihet për pjesëmarrjen e tij në rubrikën “PërPuthen”.
Dejvi i tha deputetes se në politikë ekziston nepotizmi duke shtuar se dhe ajo është në politikë për shkak të kontributit të babait. Një gjë të tillë deputetja e pohoi, por shtoi se ajo ka punuar shumë që të arrinte këtu.
Dejvi: Na shqetëson fakti që politikanët sot janë fëmijët e ish-politikanëve, kjo është një problem. Dhe ju jeni aty ku jeni prej kontributit të babait.
Rudina Hajdari: Nëse unë do të kisha jetuar në Shqipëri do ta kuptoja këtë problem tëndin. Gjatë jetës sime kam vuajtur, kam kaluar gjëra të jashtëzakonshme. S’më është dhënë asgjë nga hiçi si dhuratë. Dëshira ime e vetme ishte që të rikthehesha në Shqipëri si politikane. Unë ndihem krenare që im at, ka bërë atë që ka bërë. Unë ndaj të njëjtën shqetësim me ty. Nuk e kam problem fare ti kthej përgjigje kësaj gjëje sepse është problem i madh.
