Ditën e sotme gjatë një mbledhje virtuale me Komisionin e Sigurisë Kombëtare, Drejtori i Policisë së Shtetit, Ardi Veliu u pyet për rastin e 15-vjeçarit që u dhunua nga policët. Ai nxorri një video nga Facebook-u i nënës së të miturit, në të cilën ajo shfaqej me pistoletë në dorë.
"Do iu shfaq një video të mamasë së tij, që të shikoni se nga çfarë familje vjen. Kjo është mamaja e djalit me pistoletë në dorë. Për të thënë se nga çfarë familje vjen. Jo se dua të mbroj policinë, por duhet të jemi realistë dhe të ftohtë në gjykim", tha Veliu.
Pas deklaratës së tij reagoi dhe e ëma e 15-vjeçarit, Zaida Çobo. Ajo sqaroi se pistoleta ishte lodër dhe për më tepër videoja ishte shkëputur nga xhirimet e një filmi. Çobo u shpreh se do ta denonconte Drejtorin e Policisë.
Së fundmi në një deklaratë në faqen zyrtare të Policisë së Shtetit, Veliu shprehet se është vënë personalisht në shënjestër dhe fjalët e tij janë nxjerrë nga konteksti. Ai thotë se ka bërë thjesht një ilustrim se si nuk mund të fajësohet gjithmonë vetëm punonjësi i Policisë pa konsideruar të gjithë kontekstin e situatës.
Po ashtu Veliu ka kërkuar falje për keqkuptimin në komentin e tij.
Deklaratë e Drejtorit të Përgjithshëm të Policisë së Shtetit Ardi Veliu:
Jam i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të dhe sot përsëri e njëjta gjë.
Ndërkohë që ne jemi organizata më rigoroze në goditjen e fenomeneve brenda vetes, mjafton që një punonjës i yni të bëjë një gabim dhe megjithëse ndëshkohet në radhë të parë prej nesh, prapëseprapë goditja vijon ndaj Policisë së Shtetit.
Sot unë jam vënë personalisht në shënjestër dhe më vjen keq për deformimin që po i bëhet realitetit të ngjarjes për të cilën fola dhe vetë qasjes sime ndaj saj.
Së pari, fjala ime nuk mund të nxirret nga konteksti, siç po bëhet.
Së dyti, kam bërë një ilustrim të idesë se nuk mundet të fajësohet gjithnjë vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate.
Së treti, kam sqaruar se punonjësi në fjalë është pezulluar dhe ka nisur hetimi disiplinor dhe penal për të.
Së katërti, unë po komunikoja hapur me deputetët, një shqetësim që është i mbarë punonjësve tanë, për demonizimin që i bëhet figurës së Policit të Shtetit dhe nuk doja të thosha më shumë se kaq.
Por në fund dëshiroj t'u them të gjithë atyre që po e gjykojnë me ngut këtë "krim" të radhës, se nëse nuk kam arritur dot ta sqaroj si duhet atë ç’ka kisha qëllim, kjo nuk mjafton për të më gjykuar me qëllim.
Këtë detyrë e kam mbajtur dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona.
Ndjesë nëse kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time!
