Ka nisur hapja graduale e kufirit Kosovë-Shqipëri. Qytetarët e Kosovës të cilët kanë leje qëndrimi apo shtetësi shqiptare janë lejuar të udhëtojnë për t’u vendosur në pronat e tyre. Në një intervistë për "Tv Klan", ambasadori i Shqipërisë në Kosovë Qemajl Minxhozi tha se këta qytetarë duhet të vetëizolohen në shtëpitë e tyre, duke respektuar rregullat e qytetit ku do të qëndrojnë.
“Kjo nuk do të thotë që ata nuk mund të dalin jashtë shtëpive dhe banesave të tyre për të kryer shërbime në orare të caktuara siç është për të gjithë qytetarët shqiptarë”, tha Minxhozi.
“Është shumë e rëndësishme që ta kuptojmë që duhet patjetër që shifrat të shkojnë drejt zeroz që njerëzit e Kosovës të mund të shkojnë drejt territorit të Shqipërisë si dhe ata të Shqipërisë drejt Kosovës. Deti aty është, aty do të jetë. Jam i bindur se Qershori më së largu mesi i Qershorit ose më vonë nëse jemi strikt ne do i afrohemi më shumë detit, në të kundërtën do t’i largohet”.
Ka nisur edhe lejimi i qarkullimit të mallrave, por kryesisht ato që vijnë në Portin e Durrësit drejt Kosovës.
Burimi: tvklan.al
