Koronavirusi është përhapur me shpejtësi në shumë vende të botës. Fatmirësisht në vendin tonë rastet e testuara kanë rezultuar negative dhe Shqipëria vijon të mbetet e paprekur nga virusi. Megjithatë janë marrë masa mbrojtëse dhe parandaluese.
Presidenti Ilir Meta ka bërë së fundmi një apel duke kërkuar që të merren të gjitha masat për të përballuar situatën e Koronavirusit, sidomos duke parë gjendjen e shteteve fqinje si Italia dhe Greqia.
Ai shprehet se duhet të vihet në dispozicion financim të plotë për stafin mjekësor si dhe të angazhohen të gjithë ekspertët e fushës higjieno-epidemiologjike. Po ashtu Meta bën thirrje të aplikohet "Zona e kuqe" si në Itali. Me këtë ai nënkupton aplikimin e të gjitha kufizimeve e veprimeve që ky regjim kërkon dhe marrja e masave të monitoruara 24 orë.
Deklarata e Presidentit Ilir Meta:
Kam ndjekur me shqetësim të madh zhvillimet lidhur me pandeminë e coronavirusit, që për fat të keq janë rënduar së tepërmi, kur të gjithë do të donim që të ndodhte e kundërta.
Në 31 Janar të këtij vitit kam tërhequr publikisht vëmendjen për marrjen e masave sanitaro-epidemiologjike shumë të forta nga vendi ynë, edhe pse atëherë Italia kishte vetëm 2 të prekur nga coronavirusi.
Sot situata paraqitet shumë më e rënduar në të gjithë botën, ku rezultojnë 106 vende të prekura, ndërsa Italia veçanërisht ka një rëndim ekstrem me mbi 5061 raste dhe rreth 233 vdekje.
Duke vlerësuar:
– këtë situatë shumë serioze epidemiologjike rajonale;
– faktin që situata në Itali është rënduar duke kapërcyer edhe “Zonën e kuqe”, me përshkallëzim në të gjithë territorin e saj me një mortalitet të lartë rreth 4,4%, dhe imponuar marrjen prej saj të masave shumë të forta kufizuese;
– rritjen shumë të shpejtë të rasteve të infektuara në Greqi;
– shfaqjen e rasteve të coronavirusit edhe në vende të tjera të rajonit tonë që rezultonin te paprekura;
– në informacionin që Organizata Botërore e Shëndetësisë jep për karakteristikat e këtij virusi e rreziqet serioze që ai paraqet;
Apeloj:
Është emergjente forcimi maksimal i masave parandaluese sanitaro-epidemiologjike;
Për shkak se gjendja në Itali por edhe përhapja në rritje në Greqi, dy vende me të cilat kemi shkëmbimet më intensive, imponon aplikimin e masave të “Zonës së Kuqe”, si ato të marra në Itali, aplikimin e të gjitha kufizimeve e veprimeve që ky regjim kërkon, si dhe marrjen e masave organizative energjike dhe të monitoruara 24 orë në 24;
Vënien në dispozicion të financimit të plotë, shumë më të madh se ai i deritanishëm, për përballimin e situatës si dhe sigurimin e mbrojtjes së plotë dhe efikase të të gjithë personelit mjekësor të mobilizuar për përballimin e situatës;
Angazhimin e të gjithë kualiteteve njerëzore shkencore, por edhe të atyre me eksperiencë në fushën e epidemiologjisë e higjienës, qofshin edhe jashtë shërbimit aktiv.
