I ftuar tek "Rudina", regjisori i njohur, Namik Ajazi ka treguar për herë të parë historinë e dashurisë së tij me ish-deputeten Majlinda Bregun me të cilën ka 22 vite i martuar, Ajazi tregoi se ka qenë realizimi i kronikës për kolerën, që u bë shkak i njohjes midis tyre.
“Jemi njohur në TVSH, ishte një moment në ’94, kur u fol për një epidemi kolere. Unë vij nga Telenorba për të xhiruar diçka, me një grup miks, pra do të përdornim të njëjtin operator dhe Majlinda asokohe bashkëpunonte me televizionin, ishte në vitin e fundit në Fakultetin e Shkencave Sociale, bashkëpunonte me televizionin si gazetare dhe spikere lajmesh e orës 20:00. Kështu që qëlluam që bëmë atë udhëtim bashkë për të bërë kronikën. Nuk ishte mbase kolera, por kjo u bë shkak i njohjes mbas së cilës ne filluam të takoheshim. Unë vendosa të bëj hapin e madh të fejoheshim dhe të krijonim familje”, tregoi Ajazi.
Filmi i Ajazi, “Amanet” ka rrëmbyer çmimin e parë në Festivalin e Filmit në Salerno, mes 73 filmave artistikë me metrazh të gjatë.
